చిత్రం-9
-గణేశ్వరరావు
కొరియన్ చిత్రకారిణి క్వాన్ క్యాంగ్ యప్ ఏకాంతాన్ని సున్నితంగా తన చిత్రాలలో చూపిస్తుంది. ఈ చిత్రానికి పెట్టిన పేరు: ‘పట్టీలు ‘ . అలంకారిక కళ లో చిత్రించింది. ఈ బొమ్మను చూస్తున్నప్పుడు ఏ దేవతనో, అంతరిక్షవాసినో, కలలో కవ్వించే సఖినో చూస్తున్నట్టుంటుంది . బొమ్మలో శారీరక లోపాలు లేవు . మొహం ముత్యం లా తెల్లని తెలుపు రంగులో మెరిసిపోతూంది. ఎక్కడా మచ్చుకైనా ముఖంలో ముడతలు లేవు. మెరుస్తూన్న శరీరాన్ని చూపించడం కేవలం తైల వర్ణ చిత్రంలోనే వీలవుతుంది. లేత నీలి రంగులో చిత్రించిన కళ్ళు మనల్నే చూస్తూ ఏ క్షణంలోనేనా వర్షించడానికి సిద్ధంగా ఉన్నాయా అనిపిస్తుంది. వాటిలో అంతగా దైన్యం గూడుకట్టుకుని ఉంది. తలకు కట్టుకున్న గాజుగుడ్డ ఏదో తెలీని మానసిక బాధనీ, ఆమె బందీ అన్న భావనని తెలియజేస్తోంది. ఆ కట్టు బానిసత్వానికి ప్రతీక . బొమ్మలోని అణువణువూ ఆమె మానసిక ఆందోళనిని కనబరుస్తోంది. కేవలం కనీస అంశాలే బొమ్మలో చిత్రించబడ్డా, అవి అనేక భావాలని విస్తృతంగా తెలియచేస్తూ, రకరకాల అనుభూతులని కలుగజేస్తున్నాయి. మొత్తం చిత్రాన్ని నిశితంగా చూసినప్పుడు, ఆమె బలహీనత గోచరించదు మనకి . తలకు పట్టీ ఉన్నప్పటికీ , చూపులు గుండె గాయాన్ని సూచిస్తున్నప్పటికీ, ఆమెలో అంతర్గతంగా దాగిన ఓర్మి, స్థిరత్వం, సహనశీలత ప్రతిఫలించేలా ఆమె బొమ్మ గీయబడింది. అది సౌందర్యానుభూతితో పాటు కరుణరసానుభూతిని కూడా కలిగిస్తుంది, భౌతిక, ఆధ్యాత్మిక, భావాత్మక రసానుభూతులకు కూడా తావిస్తుంది.
*****
గణేశ్వర్రావు ప్రముఖ రచయిత. చిత్రకళ పట్ల వీరికి అమితమైన ఆసక్తి. ప్రత్యేకించి వీరు రాసే చిత్ర కథనాల ద్వారా ఎందరో గొప్ప చిత్ర కళాకారుల్ని పరిచయం చేసారు. ప్రస్తుత నివాసం హైదరాబాద్. ప్రముఖ అనువాదకులు, కేంద్ర సాహిత్య అకాడెమీ అవార్డు గ్రహీత శాంతసుందరి గారు వీరి సతీమణి.