“నెచ్చెలి”మాట
బీ గుడ్ – డూ గుడ్
-డా|| కె.గీత
“బీ గుడ్ – డూ గుడ్ ”
మంచిగా ఉండడం-
మంచి చెయ్యడం-
వినడానికి ఎంత మంచిగా ఉందో
పాటించడం అంత కష్టం కదా!
పోనీండి!
ప్రతి రోజూ
ప్రతి క్షణం
మంచి చెయ్యలేకపోయినా
“ఎప్పుడో ఓసారి
అనుకోకుండా
మనకు తెలియకుండానే చేసిన
కాస్తో కూస్తో మంచి కూడా
ఏదో విధంగా మనల్ని తిరిగి కాపాడుతుంది!”
వినడానికే కాదు
పాటించడానిక్కూడా బావుంది కదూ!
అవును
మనం చేసే మంచే మనల్ని కాపాడుతుంది!
మనం చేసే చెడే మనకి కష్టాల్ని తెచ్చిపెడుతుంది!
ఇంకొంచెం క్లియర్ గా చెప్పుకుంటే
మనం చేసే మంచి మనకు విజయాల్ని తెచ్చిపెట్టకపోయినా
మనం చేసే చెడే మనకి అపజయాల్ని తెచ్చిపెడుతుంది!
అంతెందుకు
అమెరికా అధ్యక్ష ఎన్నికల్లో
డెమాక్రటిక్ పార్టీ గెలవడం వెనుక
ఆ పార్టీ అభ్యర్థి గొప్పతనం ఉందా?
రిపబ్లికన్ పార్టీ అభ్యర్థి పట్ల
వ్యతిరేకత ఉందా?
ఏమో దేవుడికెరుక అంటారా?
పోనీ
ఆసియన్లకి పీకేల్దాకా కోపం తెప్పించిన
“చైనా వైరస్” వంటి ఎత్తిపొడుపు మాటలు-
అక్రమ వలసల పేరుతో
గోడ కట్టించడంతో ఆగకుండా
సౌత్ అమెరికన్లకి బాగా మంట తెప్పించిన
పిల్లల్ని, తలిదండ్రుల్ని వేరు చెయ్యడం
పసిపిల్లల్ని కూడా జైళ్లలో వెయ్యడం వంటి పన్లు –
పోనీ
నిబంధనల కఠినతరం పేరుతో
పొరబాట్న స్వదేశానికి వెళ్లిన మధ్యాసియా పౌరుల్ని
వెనక్కి రానివ్వక పోనివ్వడం-
భారతీయుల వీసా కోటాలకి మొత్తానికే కళ్లేలు వెయ్యడం-
అన్నిటికంటే ముఖ్యంగా
“బ్లాక్ లైవ్స్ మేటర్ “ అంటూ
నెలల తరబడి
రోడ్లపై నినదించాల్సిన
పరిస్థితులు
అసలే కోవిడ్ దెబ్బకి
పెద్దపెట్టున నమోదవుతున్న మరణాలు
ఉద్యోగాల్లేక అల్లకల్లోలమవుతున్న జీవితాలు
ఒకటేమిటి
అన్ని వైపుల్నించి చుట్టుముట్టిన
ఆగ్రహావేశాలన్నింటికీ
కారణం
“బీ గుడ్ – డూ గుడ్” అన్నది
మర్చిపోవడమేనా?
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.