వెనుకటి వెండితెర -3

రకరకాల భావోద్వేగాలు, ఆదర్శాలు, కళారాధన, కాల్పనిక ఊహలూ గల మంచి మంచి దర్శకులు సినిమాపట్ల ఆకర్షితులై, తెలుగు సినిమాల్లోకి వచ్చారు. సినిమా తీయాలంటే ఆలోచనలు, అభిరుచీ వుంటే చాలదు. డబ్బు బాగా పెట్టుబడి పెట్టగల ధనవంతులు కూడా వుండాలి. సినిమా అనేది ఒక లాటరీలాంటిదే గ్యారంటీగా డబ్బు తిరిగి వస్తుందని ఎవ్వరూ చెప్పలేరు. సినిమా ప్రేక్షకుడికి నచ్చాలీ, డబ్బులు పెట్టి టికెట్ కొనుక్కొని సినిమాహాల్లోకి రావాలి. అదీ ఒకేసారి వచ్చిన చాలదు. పదే పదే చూడాలనిపించే ఆకర్షణ అందులో వుండాలి.

బి.ఎన్. రెడ్డిగారు కళాత్మకమైన దృష్టిలో ఆలోచిస్తూ, లలిత సౌందర్యమైన ప్రేమకథల వైపు మొగ్గు చూపారనిపిస్తుంది. అలాగే కె.వి. రెడ్డిగారు నాటకీయత, చమత్కారం, ఉత్కంఠ కలిగించే కథావిధానం యిష్టపడే వారనిపిస్తుంది. ఇంక ఎల్.వి. ప్రసాద్ గారు సాంఘిక దురాచారాలవైపు, సమస్యలవైపు దృష్టి పెట్టి, ఆ చెప్పడం హాస్యరసభరితంగా వుండాలని ఆశించారనిపిస్తుంది. అయితే ఈ పై లక్షణాలన్నీ ఆనాటి అందరి దర్శకుల్లో ఎంతో కొంత, సమయాన్ని బట్టి వున్నాయని చెప్పుకోవాలి. అందుకే పి. పుల్లయ్య, సి. పుల్లయ్యగారు, వేదాంతం రాఘవయ్యగారు కూడా తమ సినిమాలతో ప్రేక్షకుల్ని అలరించారు. 

విజయా సంస్థ ఏర్పడి రెండు సినిమాలు తీసి మేధావుల మన్ననలు పొందింది. అయితే షావుకారు సినిమాకు పేరు, మెప్పు బాగా వచ్చినా డబ్బులు రాలేదని చెప్పుకున్నారు.  ఆ నష్టాల్ని పూడ్చుకుని, నిలబడటానికీ (1951) పాతాళ భైరవి తీసి, కనకవర్షం కళ్ళచూశారు. ఆ తర్వాత మూడో చిత్రంగా ప్రసాద్ గారికి పెళ్ళి చేసి చూడు అప్పగించారు. ప్రసాద్ గారి సమాజంలో వున్న దురాచారాలను ఎత్తిచూపి, ప్రక్షాళన చేయాలనే ధ్యాస ఎక్కువ. అందుకే ‘వరకట్నం’ మన సమాజంలో ఎలా పాతుకుపోయిందో చూపుతూ, ఒక ఆదర్శవంతమైన మెసేజ్ ఇవ్వాలని అనుకున్నారు. ఈ పెళ్ళి చేసి చూడు కథ చక్రపాణిగారిది. అంటే విజయాసంస్థ అధినేతలు నాగిరెడ్డి-చక్రపాణి లలో ఒకరన్నమాట. సినిమా వెనుక స్ఫురించేది గంభీరమైన సమస్యే అయినా, సినిమా సాగడం హాస్యంగా, అందంగా సాగుతుంది.

ఇందులో హీరో నందమూరి తారక రామారావుగారే (N.T.R.) ఆయన విజయావారి హీరో – వారికి ఎప్పుడూ ఆయనే హీరో, కథానాయికలు మారుతూ వుంటారు. మరీ ప్రఖ్యాతి చెందిన హీరోయిన్ కాకుండా, సామాన్యమైన అమ్మాయిని తీసుకుని పెద్ద హిట్ చేయడం వారికి అలవాటు –

ఈ పెళ్ళిచేసి చూడులో హీరోయిన్. జి. వరలక్ష్మి, చక్కని రూపం, మంచినటనా, సంభాషణలు అందంగా చెప్పగల స్పష్టత, నేర్పుగల నటి జి. వరలక్ష్మి.

అప్పటికి కథ – తెరమీద కాస్త కొత్తగా వున్నా, మరీ ప్రేక్షకులు ఊహించలేని కథేమి కాదు. ఇందులో ఎన్.టి. రామారావు – జోగారావు – ఎస్.వి. రంగారావు – శివరామకృష్ణయ్య-సావిత్రి కనిపిస్తారు. ప్రధానంగా – సావిత్రి కొత్త కొత్తగా వస్తున్న రోజులు. ఇందులో చాలా చిన్న పాత్ర.

మొత్తం కట్నం డబ్బు, ఎదురుగా పెడితేగానీ పుస్తె కట్టెడు పెళ్ళి కొడుకు అంటాడు. పెళ్ళి కొడుకు తండ్రి. ఆ వేషం డా. శివరామకృష్ణ వేశారు. మన కథానాయకుడు (ఎన్.టి.ఆర్.) కాస్త ఆదర్శాలున్నవాడే కానీ తండ్రి మాట దాటలేని అయోమయంలో పడతాడు. తండ్రి తాళికట్టవద్దని అరుస్తూ వుంటాడు. కానీ అతను పస్తె మూడుముళ్ళు వేసి, ఏమీ ఎరగనట్టు చూస్తాడు. అతను అటూ యిటూ చూస్తూ సందిగ్ధంగా చూస్తున్నప్పుడు పెళ్ళికూతురు అతని పాదాలు పట్టుకుని కన్నీరు కారుస్తుంది. మొత్తానికి పెళ్ళిఅయినట్టూ, కానట్టూ అంతా లేచి వెళ్ళిపోతారు. కట్నం డబ్బు యిచ్చి చెల్లెల్ని అత్తారింటికి పంపాల్సిన బాధ్యత అన్న జోగారావు మీద పడుతుంది. హీరో తనతో భార్యని మద్రాసు రైల్లో తీసుకుపోతాడు బావమరిది (జోగారావు) సాయంతో.

అక్కడ్నించి కథ హాస్యంతో రసవత్తరంగా మంచి మంచి పాటలతో ముందుకు సాగుతుంది. ఈ సినిమాకి ఘంటసాల వారి సంగీతం మహా పెద్ద ఆభరణంగా అమరింది.

పెళ్ళి చేసుకుని, ఇల్లు చూసుకుని

చల్లగ కాలం గడపాలోయ్ – మీ

రెల్లరు హాయిగ వుండాలోయ్- అంటూ ఘంటసాల వెంకటేశ్వరరావు గారి క:టం దేశమంతా మారుమోగిపోయింది- అదీగాక

ఏడుకొండలవాడా! వెంకటరమణా – అంటూ పి. లీల పాడిన పాట అందరి మనసుల్నీ ఎంతగానో ఆకట్టుకుంది. ప్రతీ అమ్మాయీ ఆ పాట నేర్చుకుని పాడటం ఒక అలంకరణగా సాగింది. పైగా తిరుపతి వెంకటేశ్వరుని మీద చక్కని రచన, అందమైన బాణీ- చివర్లో తండ్రిని మోసగించటానికి, ఎన్.టి.ఆర్. పిచ్చివానిగా, అతనికి సపర్యలు చేసే నర్సుగా జి. వరలక్ష్మి, అల్లరి అల్లరిగా హాస్యంగా నవ్వులు పండించారు.

జి. వరలక్ష్మి కూడా బాగా పాడగల నటి. మొదట్లో పాటల్ని ఆమె చేత పాడించినప్పటికీ, ఇంకా మెరుగుగా వుండటానికి మళ్ళీ అన్ని పాటలు పి. లీల చేత పాడించారు.

ఈ సినిమా కథ చక్రపాణి గారు కూర్చగా, పాటలు పింగళి నాగేంద్రరావు గారు కూర్చారు. ఘంటసాల వెంకటేశ్వరరావు, సంగీతం బ్రహ్మయ్యా! ఓ బ్రహ్మయ్యా అనే పాట ఊటుకూరి సత్యనారాయణ వ్రాశారు. అమ్మా-నొప్పులే కూడా ఆయనే రాశారు. 

ఈ పెళ్ళి చేసి చూడు సినిమా బాగా ఘన విజయం సాధించింది. విజయావారి విజయపతాకం ఎగురవేసింది.