చిత్రం-33

          సుప్రసిద్ధ చిత్రకారుడు జాన్ సింగర్ సార్జెంట్ కి ఫ్రాన్స్ లో గోచరో (Gautreau) తో పరిచయం అయింది. ఆమెది అపురూప సౌదర్యం – కొనదేరిన ముక్కు, ఎత్తైన నుదురు, హంసను గుర్తుకు తెచ్చే మెడ, సన్నని నడుము. ఇసుక గడియారం లాంటి వంపు సొంపులున్న ఆకృతి – ప్రతీ చిత్రకారుడికి ఆమె బొమ్మ గీయాలని, పాలరాతిపై శిల్పం చెక్కాలనీ అనిపించేది . సార్జెంట్ ఆమె వ్యామోహంలో పడ్డాడు. ఆమె చిత్రం గీయడానికి అనుమతి అడిగాడు. అప్పటికే ఆమెకి ఒక ఐశ్వర్యవంతుడైన బ్యాంకర్ తో పెళ్లయింది. కాగా సార్జెంట్ ఆమెకి అందంలో తీసిపోడు – ఎన్నో దేశాలు చుట్టి వచ్చిన చిత్రకారుడు, పియానో వాద్యగాడు, నాట్యకాడు, మాటకారి. ముందు ఆమె తల్లి ఒప్పుకుంది. గోచరో ని కొద్దిపాటి అధ్యయనం చేసాక ఆమె చిత్రాన్ని చిత్రించాడు. ఆమె పొడవాటి శాటిన్ లంగా, మెడకు బాగా దిగువగా వెల్వెట్ బాడీ ధరించింది, పల్చని నగ-పట్టీలు తప్పిస్తే భుజాలు నగ్నంగా ఉన్నాయి. తలని కొద్దిగా ఎడమవైపు కి వాల్చింది. ఎడమ చేతితో బట్ట కుచ్చులను పట్టుకుని నడుంపైన వేసింది , కుడి అరచేతిని ముడిచి టేబుల్ కొసను పట్టుకుంది. జుట్టుని పైకి ఎగదోసి వజ్రం తాపిన చిన్న కిరీటంతో అలంకరించింది. అలా ఆ భంగిమలో నిల్చోడం కష్టo , తన ఆకారాన్ని పూర్తిగా చూపరులవైపు తిప్పింది, అపురూపమైన భంగిమ. మడతలు కనబడుతున్న ముదురు నలుపు రంగు దుస్తులు, దీనికి వైరుధ్యంగా – దేదీప్యమానమైన ధవళ వర్ణం లో ఉన్న ఆమె శరీరం. చిత్రంలో కేంద్ర బిందువు – గోచరో, పక్కనే ఆమె కన్నా ఎత్తు తక్కువ ఉన్న టేబుల్, ముందు వైపు లేత తెలుగు-నలుపు రంగుల కుంచె విసురు, వెనక వైపు ముదురు గోధుమ రంగులో గోడ.. కాంతివలయంలో ఉన్న ఆమె.. .