చిత్రలిపి
నన్ను నాకు వదిలేయండి …
-మన్నెం శారద
అవును ….మీరు విన్నది నిజమే …
దయచేసి నన్ను నాకు వదిలేయండి !
తెలతెలవారుతూనే తెగ పనులున్నట్లు
ప్రొద్దుకుంకేవరకు పడీ పడీ విన్యాసాలు చేస్తూ
ఇన్నిరోజులు ఆకాశ సంద్రంలో ఈదులాడేను !
ఇప్పుడారెక్కలు సత్తువ ఉడిగి చతికిలపడ్డాయి
రంగురంగు ఈకలు పాలిపోయి నేలకు జారుతున్నాయి
ఇప్పుడే రెక్కలొచ్చి వాటికి రంగులొచ్చిన
వయసొచ్చిన వన్నెలాడి పిట్టలు కొన్నినన్ను చూసి
ఇక్కడున్నావా అంటూ
ఎకసెక్కాలాడుతూ కారుకూతలు కూస్తూ
కిందామీదకు పల్టీలు కొడుతూ తిరుగుతున్నాయి
నాకునిజంగా నవ్వొస్తుంది
ఆ వయసు దాటొచ్చిన దాన్ని కాదా నేను ??
పుట్టబోయే బిడ్డల కోసం మూతి ముక్కలు చేసుకుని
రెక్కలు సాచి ఎగిరి ఎగిరి పుల్లా పుడక ఏరి గూళ్ళు కట్టి సాకిన వైనం
ఇప్పుడెవరికి గుర్తు !
పోనివ్వు
ఇప్పుడిక ఈ ఆఖరి మజిలీలో …
చేరవలసిన చోటుకే చేరుకున్నాను
ఆకాశపు వడిలో ఆకుపచ్చని తోటలో ఏటి ఒడ్డున
చివరి మలుపులో చింతలుడిగి సేద తీరుతున్న నన్ను
దయచేసి నా దారికి నన్ను వదిలేయండి !
మీ పిలుపులరొదతో నాకు తపోభంగం చేయకండి !
*****
Please follow and like us:
నా పదహారవ ఏటనుండి కథలు రాస్తున్నాను. నా మొదటి మూడు నవలకి బహుమతులు వచ్చాయి. అనేక కథలు బహుమతులు అందుకున్నాయి. రెండుసార్లు నంది అవార్డ్స్ అందుకున్నాను. తెలుగు యూనివర్సిటీ నుండి ఉత్తమ రచయిత్రి అవార్డు అందుకున్నాను. నంది అవార్డ్స్ కమిటీ లో రెండుసార్లు పనిచేసాను. The week Magazaine నన్ను Lady with golden pen గా ప్రశంసించింది. దాదాపు వెయ్యి కథలు, 45 నవలలు రాసాను. చిత్రకళ నా హాబీ.