అంతస్సూత్రం
-పి.లక్ష్మణ్ రావ్
మండుతున్న అగ్ని కొలిమి పై
భూతలాన్ని పెనంగా పెట్టి
చంద్రుడ్ని అట్టుగా
పోస్తుంది అమ్మ !
అట్టు మధ్య
చిన్నచిన్న రంధ్రాలే
చంద్రునితో జత కలిసే తారలు !
ముఖస్తంగా చంద్రుడు
వెన్నెలై మెరుస్తున్నా
క్రింద అమావాస్య చీకటి
దాగి వుందనేది నర్మగర్భం !
అట్టుని
అటూ ఇటూ తిరగేయడమే
శుక్ల పక్షం, కృష్ణ పక్షం !
ఓ చిన్నారీ !
వెన్నెల కురిపించే చంద్రునికే
చీకటి వెలుగులున్నట్లు
జీవితంలో
కష్టసుఖాలు సమానమే తండ్రీ !
నోరూరించే అట్టులోనూ
దాగివున్న రహస్యమదే!
ఒకవైపే వుంటే మాడిపోద్ది
రెండు వైపులా తిరగేస్తుంటేనే
రుచులు పంచుతాది !
*****
Please follow and like us:
నేను సాహిత్య రంగంలో 2004లో అడుగుపెట్టాను. నానీలు,హైకూలు, మినీ కవిత్వం, రెక్కలు, వచన కవిత్వం,దీర్ఘ కవిత, సామాజిక వ్యాసాలు, సాహిత్య వ్యాసాలు, చింతన వ్యాసాలు, సమీక్షా వ్యాసాలు ఇలా వివిధ ప్రక్రియలలో రచనలు చేసి 20 పుస్తకాలు ముద్రించాను.
నా సాహిత్యం పై ఆంధ్రా యూనివర్సిటీలో పరిశోధన జరిగి శ్రీమతి చుక్కా వరలక్ష్మి కి డాక్టరేట్ ప్రదానం జరిగింది.