“నెచ్చెలి”మాట
ఆరోగ్యమే మహాభాగ్యం!
-డా|| కె.గీత
ఆరోగ్యమే మహాభాగ్యం!
శరీరమాద్యం ఖలు ధర్మసాధనం!!
అవునండీ
అవును-
తెలుసండీ
తెలుసు-
అన్నీ ధర్మ సూక్ష్మాలూ
తెలుసు-
అయినా
ఇప్పుడు
ధర్మ సూక్ష్మాలు
ఎందుకో!
అదేమరి!
మానవనైజం!!
ఏదైనా ముంచుకొచ్చేవరకూ
పట్టించుకోం
పట్టించుకునేసరికే
ముంచుతుంది
ఏవిటట?
ముంచేది-
మునిగేది-
హయ్యో
అదేనండీ
ఆరోగ్యవంతమైన శరీరం-
శరీరపుటారోగ్యం-
తెలుసండీ
తెలుసు-
అన్నీ
తెలుసు-
కానీ
ఇన్నేసి
పనులు చెయ్యకపోతే
కొంపలు మునిగిపోవూ!
“పోవు”
అసలే
జీవితం క్షణభంగురం
హయ్యో! ఇక్కడా
ధర్మ సూక్ష్మాలే –
పనిచేసేవారు లేకపోతే
పనులు ఎక్కడివక్కడ
ఆగిపోవూ!
“పోవు”
సంపాదించేవారు లేకపోతే
అందరి జీవితాలు
చెల్లాచెదురై పోవూ!
“పోవు”
అయినా
ఏ
ధర్మ సూక్ష్మాలూ
పాటించం!
అయితే
ఏవిటట?
అయితే
మీ ఇష్టం-
త్వరలోనే
ఏ భాగ్యమూ లేని ఆరోగ్యం…
ఏ సాధనానికీ పనికిరాని శరీరం….
ఎంతమాట!
ఎంతమాట!
బాబ్బాబు
అదేదో చెప్పి
పుణ్యం కట్టుకోండి
ఏవీ లేదండీ
ఆరోగ్యమే మహాభాగ్యం!
శరీరమాద్యం ఖలు ధర్మసాధనం!!
****
నెచ్చెలి పాఠకులందరికీ సదవకాశం:
ప్రతినెలా నెచ్చెలి పత్రికలో వచ్చే రచనలు / “నెచ్చెలి” యూట్యూబ్ ఛానెల్లో వచ్చిన ఆర్టికల్స్ వేటిపైనైనా వచ్చిన కామెంట్ల నించి ప్రతి నెలా ఒక ఉత్తమ విశ్లేషణా త్మక కామెంటుని ఎంపిక చేసి ప్రకటిస్తాం. పాత రచనల మీద కూడా కామెంట్లు చెయ్యవచ్చు.
మరింకెందుకు ఆలస్యం? రచనల్ని చదివి వివరంగా కామెంట్లు పెట్టడం ప్రారంభించండి.
వినూత్నం, వైవిధ్యం ప్రధాన నిలయాలైన “నెచ్చెలి” వస్తున్న వివిధ వినూత్న రచనల్ని తప్పక చూసి, చదివి ఆనందిస్తారు కదూ!
*****
జనవరి 2024 లో ఎంపికైన ఉత్తమ కామెంటు రాసిన వారు: రవి
ఉత్తమ కామెంటు అందుకున్న పోస్టు: గులకరాళ్ళ చప్పుడు (కథ) – శ్వేత యర్రం
ఇరువురికీ అభినందనలు!
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.
ఆరోగ్యమే మహాభాగ్యం ‘ సందేశం కవిత రూపంలో ఇచ్చిన తీరు చాలా చక్కగా ఉంది. అభినందనలు గీత గారు.
ధన్యవాదాలు సుగుణ గారూ!
ఆరోగ్యమే మహాభాగ్యం!
“నెచ్చెలి”మాట పసందుగా ఉంది.. ఆరోగ్యంతోనే అందం ఆనందం.
ధన్యవాదాలు ఉమాభారతి గారూ!