“నెచ్చెలి”మాట
ఫ్లెక్సీ
-డా|| కె.గీత
జన్మదిన శుభాకాంక్షలు!
చాలా థాంక్సండీ-
ఇంతకీ ఎవరికి?
అదేవిటీ?
నిలువెత్తు బొమ్మతో
వీథి మొదట్లో నించి
ఊరి నలుమూలలా
ఫ్లెక్సీలు వేయించాం కదా!
అందుకే
సందేహం
వచ్చింది
పోస్టరులో
మధ్య ఉన్న బొమ్మదా?
చుట్టూ ఉన్న పది పదిహేను
బొమ్మలదా?
అంటే
స్థానిక ఛోటా మోటా
నాయక లక్షణాలున్న
ఎవరికో
బర్త్ డే
అని చెప్పి
ముఖ్యమంత్రి
ఉప ముఖ్యమంత్రి
మరో మంత్రి
మరో నాయకురాలు
ఇలా
ఇందరి ఫోటోల్లో
శుభాకాంక్షలు
ఎవరికీ
అని!
అయినా
సగం రోడ్లని
ఆక్రమించేసుకుని
చక్రాల్లాగా
డబ్బాల్లాగా
ఒకళ్ళని
మించి
మరొకళ్ళు
బొత్తిగా
ఫ్లెక్సిబిలిటీ
లేని
ఈ నిలువెత్తు
బడాయి
ఫ్లెక్సీలేవిటి?
అసలెటు పోతున్నాం?
ఆర్భాటాలు
డాబులు
దర్పాలు
పెళ్ళంటే
నూరేళ్ల పంట మాట
అటుంచి
మూడు రోజుల మంట
మెహందీ-
సంగీత్ –
హల్దీ-
ఎవరికో
పుట్టినరోజంటే
పెళ్లి రోజంటే
ఊరంతా టముకు ఫ్లెక్సీలు
పండగంటే
మొత్తం దండగే
ఓ పక్క
ప్రభుత్వాలు
పేదరికాన్ని
నిర్మూలిస్తాయిష!
మనలో మన మాట
కనీసం
ఫ్లెక్సీల్ని
నిర్మూలించలేని
మనం
పేదరికాన్ని
నిర్మూలించగలమా?
****
నెచ్చెలి పాఠకులందరికీ సదవకాశం:
ప్రతినెలా నెచ్చెలి పత్రికలో వచ్చే రచనలు / “నెచ్చెలి” యూట్యూబ్ ఛానెల్లో వచ్చిన ఆర్టికల్స్ వేటిపైనైనా వచ్చిన కామెంట్ల నించి ప్రతి నెలా ఒక ఉత్తమ విశ్లేషణా త్మక కామెంటుని ఎంపిక చేసి ప్రకటిస్తాం. పాత రచనల మీద కూడా కామెంట్లు చెయ్య వచ్చు.
మరింకెందుకు ఆలస్యం? రచనల్ని చదివి వివరంగా కామెంట్లు పెట్టడం ప్రారంభించండి.
వినూత్నం, వైవిధ్యం ప్రధాన నిలయాలైన “నెచ్చెలి” వస్తున్న వివిధ వినూత్న రచనల్ని తప్పక చూసి, చదివి ఆనందిస్తారు కదూ!
*****
జూలై, 2024 లో ఎంపికైన ఉత్తమ కామెంటు రాసిన వారు: శింగరాజు శ్రీనివాసరావు
ఉత్తమ కామెంటు అందుకున్న పోస్టు: యోధ ( బి.కళాగోపాల్ కవిత)
ఇరువురికీ అభినందనలు!
****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.
మనం పేదరికాన్ని నిర్మూలించగలమా?
లేదు! పేదరిక నిర్మూలన పేరుకు మాత్రమే, పెన్నిధి మాత్రం పెత్తందార్లకు !
ఘోరమైన గాలి వానలకు ఫ్లెక్సీలు విరిగి అపాయాలు, ప్రాణ నష్టాలు జరిగిన సంఘటనలు కూడ ఉన్నాయి. చిన్న, పెద్ద ఏదైనా సరే ఫంక్షన్ అంటేనే ఫ్లెక్సీ! మనం ముదండుగు వేస్తున్నామా? లేక రివైండ్ అయ్యి వెనక్కి.. అదే అజ్ఞానం లోకి జారు కుంటున్నమా!?
అసలు ఫ్లెక్స్ లో ఎవరి పుట్టినరోజు అని వ్రాయరు. నిజంగా కన్ఫ్యూషన్. ఇక తరువాత చినిగిన ఫ్లెకిసి చెత్త ఎలాగూ భూమికి భారం 👌👌👌