“నెచ్చెలి”మాట
మాతృదినోత్సవం
-డా|| కె.గీత
మాతృ దినోత్సవం
అనగానేమి?
మదర్స్ డే-
మదర్స్ డే
అనగానేమి?
మాతృ దినోత్సవం
అయ్యో రాత!
మరోమాట చెబుదురూ-
మాతృ దినోత్సవం
అనగా
అమ్మని గౌరవించుట
శభాష్-
గౌరవించుట అనగానేమి?
వాట్సాపులో
మాంఛి
తల్లీ బిడ్డల బొమ్మొకటి
ఫార్వార్డు
చేయుట-
ఫేసుబుక్కులో
చిన్నప్పటి
ఫోటోలు
గోడనతికించుకుని
ఫోజులు
ఇచ్చుట-
ఆన్ లైనులో
వొంటింటి పాత్రేదో
కొని పడేసి
డోర్ డెలివరీ
ఇప్పించుట-
ఇదంతా చెయ్యడం
కూడా కష్టమైపోయినట్లు
ఇంకొంచెం ముందుకెళ్లి
చిన్నప్పుడంతా
అమ్మ కొంగు పట్టుకుని తిరిగి
పెద్దయ్యాకా
తల్లిని ఓల్డ్ ఏజ్ హోమ్ పాల్జేయుట-
పండగొచ్చినా
పబ్బమొచ్చినా
పట్టించుకోకునుట-
చివరికి పుట్టినరోజొచ్చినా
ఆఫీసు వంక చెప్పుట-
ఇచ్చినప్పుడల్లా
ఇంచక్కా డబ్బులు గెంతుకుంటూ తీసుకుని
చివరికి
ఆస్తి పంపకాలంటూ
వేధించుట-
ఆగండాగండి
‘నిజ’గౌరవాలు ఇక చాలు-
మాతృ దినోత్సవం నాడే
అమ్మని గౌరవించకపోయినా
పాపం పిచ్చి తల్లి
ఏమీ అనుకోదు గానీ
ప్రేమగా ఓ సారి
గుమ్మం తడుదురూ-
ఒక్కరోజు
అన్నీ పక్కనబెట్టి
కష్టం సుఖం
కనుక్కుందురూ-
ఏదో కాస్త కమ్మగా
వండిపట్టుకెళ్లి
‘ఇంద’ అని చేతిలో పెడుదురూ-
బాబ్బాబు
మీకు ఎంతో
పున్నెవొస్తాది గానీ
‘అమ్మా’ అంటూ ఓ సారి
కౌగిలించుకుందురూ-
ఏ అమ్మకైనా
ఇంతకంటే
గౌరవం ఉంటుందా?!
****
నెచ్చెలి పాఠకులందరికీ సదవకాశం:
ప్రతినెలా నెచ్చెలి పత్రికలో వచ్చే రచనలు / “నెచ్చెలి” యూట్యూబ్ ఛానెల్లో వచ్చిన ఆర్టికల్స్ వేటిపైనైనా వచ్చిన కామెంట్ల నించి ప్రతి నెలా ఒక ఉత్తమ విశ్లేషణాత్మక కామెంటుని ఎంపిక చేసి బహుమతి ప్రదానం చేస్తాం. బహుమతి మొత్తాన్ని కామెంటు రాసిన వారికే కాక ఆర్టికల్ కు సంబంధించిన రచయిత/త్రికి కూడా పంచుతాం. పాతరచనల మీద కూడా కామెంట్లు చెయ్యవచ్చు.
మరింకెందుకు ఆలస్యం? రచనల్ని చదివి వివరంగా కామెంట్లు పెట్టడం ప్రారంభించండి.
వినూత్నం, వైవిధ్యం ప్రధాన నిలయాలైన “నెచ్చెలి” వస్తున్న వివిధ వినూత్న రచనల్ని తప్పక చూసి, చదివి ఆనందిస్తారు కదూ!
*****
ఏప్రిల్, 2022 లో ఎంపికైన ఉత్తమ కామెంటు రాసిన వారు: శేషు
ఉత్తమ కామెంటు అందుకున్న పోస్టు: మీటూ కథలపై సమీక్ష (పుస్తకసమీక్ష), వ్యాస రచయిత్రి: అనురాధ నాదెళ్ల
ఇరువురికీ అభినందనలు!
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.
ప్రస్తుత పరిస్థితులకు అద్దం పట్టే విధంగా ఉంది
కవిత. నేను ఈ మధ్య’అమ్మ అంబ ఐతే’అనే
కథ రాశాను.అందులోని ఆంశాలు కూడా
ఇవే.రచయిత్రి అలతి అలతి పదావతో అనంత
భావాలు పలికించారు.
ధన్యవాదాలు సుబ్రహ్మణ్యం గారూ!