“నెచ్చెలి”మాట
వైపరీత్యం
-డా|| కె.గీత
ఈ మధ్య
ఏవిటో
అన్నీ
విపరీతాలే!
ఎండకి ఎండా
వానకి వానా
చలికి చలీ
మంచుకి మంచూ
భూగోళమంతా
గందరగోళం
అయోమయం
ఏవిటీ
విపరీతాలంటే
వాతావరణం
గురించా!
మనుషుల
గురించేమో
అనుకున్నాలెండి..
అంటే
కొందరు
అయితే ఎక్కడలేని
ప్రేమా చూపించెయ్యడం
లేకపోతే
పాతాళానికి తొక్కెయ్యడం
ఇంకా కొందరైతే
ప్రేమ నటిస్తూ
వెనక గోతులు తియ్యడం
ఇక మరి కొందరు
డబ్బు కోసమే
ఆప్యాయతలు
కొనితెచ్చుకోవడం
ఇక…
చాలు
బాబోయ్
చాలు
మనుషుల్లో
వైపరీత్యాల
కంటే
వాతావరణ
వైపరీత్యాలే
నయం!
వస్తాయి
పోతాయి
మనుషుల్లో
ఎన్ని జన్మలెత్తినా
ఇదే…
మరేవిటండీ
మార్గం?
ఇదేవన్నా
హైదరాబాదులోని
నాలాలు, చెరువుల మీద
అక్రమంగా కట్టిన
ఇళ్ళనుకున్నారా
యుద్ధప్రాతిపదికన
పడగొట్టేయడానికి!
బుడమేరు కాలువ…
ముంచుతూనే ఉన్నా
ఏలినవారి తరాలు
మారాలి కానీ
మార్గాంతరం
సున్నా…
ఏవిటీ
బుడమేరు
సమస్య గురించా
చెప్తున్నదీ…
మనుషుల
గురించేమో
అనుకున్నాలెండి
అంటే
కొందరు….
చాలు
బాబోయ్
చాలు
****
నెచ్చెలి పాఠకులందరికీ సదవకాశం:
ప్రతినెలా నెచ్చెలి పత్రికలో వచ్చే రచనలు / “నెచ్చెలి” యూట్యూబ్ ఛానెల్లో వచ్చిన ఆర్టికల్స్ వేటిపైనైనా వచ్చిన కామెంట్ల నించి ప్రతి నెలా ఒక ఉత్తమ విశ్లేషణా త్మక కామెంటుని ఎంపిక చేసి ప్రకటిస్తాం. పాత రచనల మీద కూడా కామెంట్లు చెయ్య వచ్చు.
మరింకెందుకు ఆలస్యం? రచనల్ని చదివి వివరంగా కామెంట్లు పెట్టడం ప్రారంభించండి.
వినూత్నం, వైవిధ్యం ప్రధాన నిలయాలైన “నెచ్చెలి” వస్తున్న వివిధ వినూత్న రచనల్ని తప్పక చూసి, చదివి ఆనందిస్తారు కదూ!
*****
ఆగస్టు, 2024 లో ఎంపికైన ఉత్తమ కామెంటు రాసిన వారు: టి.హిమబిందు
ఉత్తమ కామెంటు అందుకున్న పోస్టు: గంజాయివనం ( నెచ్చెలి-2024 పోటీలో తృతీయ బహుమతి పొందిన నెల్లుట్ల రమాదేవి గారి కథ)
ఇరువురికీ అభినందనలు!
****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.