“నెచ్చెలి”మాట
“దేశసేవ”
-డా|| కె.గీత
దేశసేవంటే గుర్తుకొచ్చింది!
మీరు “క్లీన్ హాండ్స్” అనే విషయం విన్నారా?
“క్లీన్ హాండ్సా?”
అంటే “చేతులు శుభ్రంగా ఉంచుకోమనా?”
లేదా
“చేతులు శుభ్రం చెయ్యమనా?”
లేదా
రెండూనా?
“ఏవండీ, ఒక పక్క ప్రపంచం కరోనా బాధలో గిలగిలా కొట్టుకుంటూ ఉంటే ఈ క్లీన్ హాండ్స్/ హాండ్స్ క్లీన్ అవసరమా?”
అయినా దేశసేవ అనే టైటిలేవిటి? మధ్య ఈ “క్లీన్ హాండ్స్” గోలేవిటి?
“హయ్యో! అక్కడికే వస్తున్నానండీ!”
అసలు దేశసేవ అంటే-
విదేశీ వస్తు బహిష్కరణలో ఇంట్లో పనికిరాని వస్తువేదో త్యాగం చెయ్యడం
రంగుల “రాట్నం” ఎక్కి “రాట్నం” వడికినంత ఫీలయ్యిపోవడం
ఇంచక్కా బడికి బంకు కొట్టి రోడ్లంపట జెండా పుచ్చుకు తిరగడం
వంటివి కాకుండా –
స్వరాజ్యసమరంలో కత్తి దుయ్యడం…
సత్యాగ్రహంతో జైలుకెళ్లడం..
స్వాతంత్ర్యం కోసం ప్రాణాలకు తెగించడం…
వంటివి కాకపోయినా –
ఏదో ఉడతాభక్తిగా
పొరబాటున దేశనాయకులు జోలె పట్టుకుని మనూరు వచ్చినపుడు ఉంగరమో, వాచీయో మనసా వాచా కర్మణా డొనేషన్ చెయ్యడం కాదండీ!
అసలిప్పుడు ఈ కరోనా కష్టకాలంలో దేశసేవంటే-
కాస్తోకూస్తో ఉన్నవారైనా బొత్తిగా లేనివారికి కాసిన్ని ఉప్పులూ, పప్పులూ, సబ్బులూ దానం చెయ్యడం
మీతోబాటూ మీ పొరుగు వారికీ ఆన్లైను లో హ్యాండ్ శానిటైజర్ తయారీ నేర్పించడం
మాస్కులు కుట్టో, చప్పట్లు కొట్టో డాక్టర్లు , నర్సుల సేవలు హర్షించడం
లేకపోతే
ఒక దీపమో, కొవ్వొత్తో, టార్చిలైటో, సెల్ఫోనో పుచ్చుకుని వాకిట్లో నిలబడ్డం-
కొంపా గూడూ లేక కాలినడకని వందల మైళ్లు వలసపోతున్న వాళ్లకి బతుకుల్లోనే వెలుతుర్లేకపోతే ఈ దీపాల గోలేవిటనుకుంటున్నారా!
పోనీ ఇవేవీ కాకపోతే
శుభ్రంగా మీ ఇంట్లో మీరు ఉన్నదేదో వండుకు తిని గడపదాటకుండా కునుకు తీయడం-
ఏవిటి ఇదీ సేవే?! అనుకుంటున్నారా
అదేమరి ఇవేళ్టి దేశసేవంటే!
అసలు విషయమేమిటంటే-
ఒకప్పుడు దేశాల్ని కాపాడుకోవాలంటే
రణరంగంలోకి దూకి యుద్ధాలు చెయ్యాల్సి వచ్చేది!
కానీ ఇప్పుడు
వైరస్ ఒకరి నుండి ఒకరికి పాకకుండా ఎవరింట్లో వాళ్లు బుద్ధిగా కూచుంటే చాలు!!
అదన్న మాట సంగతి!
గంటకి పదిసార్లు చేతులు శుభ్రంగా కడుక్కుని, ఉన్న చోట కదలకుండా కూచుంటే
దేశసేవ మాత్రమే కాదు!
ప్రపంచ సేవ!!
మానవ సేవ మాధవ సేవ!!!
ఇంతకీ నా మాటేంటంటే-
ప్రాణాలకంటే ఏవీ ముఖ్యం కాదు!
గోళ్లు గిల్లుక్కూచోవడం పెద్ద కష్టవేవీకాదు!!
ఏవంటారు?
*****
డా|| కె.గీత పూర్తిపేరు గీతామాధవి. వీరు “నెచ్చెలి” వ్యవస్థాపకులు, సంపాదకులు. తూ.గో.జిల్లా జగ్గంపేటలో జన్మించారు. ప్రముఖ కథా రచయిత్రి శ్రీమతి కె. వరలక్ష్మి వీరి మాతృమూర్తి. భర్త, ముగ్గురు పిల్లలతో కాలిఫోర్నియాలో నివాసముంటున్నారు.
ఆంధ్ర విశ్వవిద్యాలయంలోఇంగ్లీషు, తెలుగు భాషల్లో ఎం.ఏ లు, తెలుగు భాషా శాస్త్రం లో పిహెచ్.డి చేసి, 10 సం. రాల పాటు మెదక్ జిల్లాలో ప్రభుత్వ కళాశాల అధ్యాపకురాలిగా పనిచేసారు. ఆంధ్ర ప్రదేశ్ ప్రభుత్వం నించి 2006 లో “ఉత్తమ ఉపాధ్యాయ అవార్డు ” పొందారు.అమెరికాలో ఇంజనీరింగ్ మేనేజ్ మెంట్ లో ఎం.ఎస్ చేసి, ప్రస్తుతం సాఫ్ట్ వేర్ రంగంలో భాషా నిపుణురాలిగా పనిచేస్తున్నారు.
ద్రవభాష, శీతసుమాలు,శతాబ్దివెన్నెల, సెలయేటి దివిటీ, అసింట కవితాసంపుటులు, సిలికాన్ లోయ సాక్షిగా కథాసంపుటి, వెనుతిరగనివెన్నెల నవల, At The Heart of Silicon Valley -Short stories (2023),Centenary Moonlight and Other Poems(2023) ప్రచురితాలు. నెచ్చెలి ప్రచురణ “అపరాజిత” – గత ముప్పయ్యేళ్ల స్త్రీవాద కవిత్వం (1993-2022) పుస్తకానికి సంపాదకులు & ప్రచురణకర్త. ‘యాత్రాగీతం’ ట్రావెలాగ్స్, ‘కంప్యూటర్ భాషగా తెలుగు’ పరిశోధనా వ్యాసాలు కొనసాగుతున్న ధారావాహికలు. అజంతా, దేవులపల్లి, రంజనీ కుందుర్తి, సమతా రచయితల సంఘం అవార్డు, తెన్నేటి హేమలత-వంశీ జాతీయ పురస్కారం, అంపశయ్య నవీన్ పురస్కారం మొ.న పురస్కారాలు పొందారు.
టోరీ రేడియోలో “గీతామాధవీయం” టాక్ షోని నిర్వహిస్తున్నారు. తానా తెలుగుబడి ‘పాఠశాల’కు కరికులం డైరెక్టర్ గా సేవలందజేస్తున్నారు. కాలిఫోర్నియా సాహితీ వేదిక “వీక్షణం”, తెలుగు రచయిత(త్రు)లందరి వివరాలు భద్రపరిచే “తెలుగురచయిత” వెబ్సై ట్ వ్యవస్థాపకులు, నిర్వాహకులు.
Manaku manam chesikone seve desaseva , prapancha seva ani needi aina saililo chakkagaa cheppaavu. Abhinandanalu Geethaa.
Thank you so much, Aunty!
బాగుంది గీతా
థాంక్స్ అమ్మా!
దేశసేవ కి కొత్త నిర్వచనాలు బాగున్నాయి గీత గారూ!
సంపాదకీయం మీకు నచ్చినందుకు, చదివి అభిప్రాయం తెలిపినందుకు మీకు బోలెడన్ని నెనర్లు వసంతగారూ!